Avadhūtasiddha: Bhagavadbhaktistotra

oṃ namaḥ netratantrāya |

pratyakṣavastuviṣayāya jagaddhitāya
viśvasthitipralayasambhavakāraṇāya |
sarvātmane vijitakopamanobhavāya
tubhyaṃ namas tribuvanaprabhave śivāya || AvBhBhS_1

satyaṃ na vedmi kim ahaṃ yad agocaro 'si
vācaspater api girām kim utāsmadādeḥ |
bhaktis tathāpi bhavato guṇakīrtaneṣu
yan māṃ niyojayati kiṃ tad ahaṃ karomi || AvBhBhS_2

khārkenduvahnimarudātmamahīpayobhir
aṣṭabhir eva tanubhir bhavatā samaste |
vyāpte jagaty aparam icchati yo 'tra vaktum
ko 'nyo hatatrapatayā sadṛśo 'sti tena || AvBhBhS_3

dhṛtyādibhiḥ svatanuvṛttibhir eva yadvad
eko bhavān vahati samprati lokayātrām |
tadvad vibho yadi jagaty aparo 'sti kaścin
nirmatsarāḥ kim api na pravadanti santaḥ || AvBhBhS_4

yogād apāstatamso bhuvanatraye 'pi
mukhyāḥ pitāmahapurandaraviṣṇavo 'pi |
adyāpi deva na vidanti kṛtaprayatnās
tattvaṃ taveti tad aho mahad indrajālam || AvBhBhS_5

bhāvodbhavasthitivipatkaraṇapravṛttau
saṃjñā vibhinnaracanās tvayi sambhavanti |
sāmye sthitaḥ pratinivṛttasamastakāryo
nendro na viṣṇur asi nāpi pitāmaho 'si || AvBhBhS_6

kecid bhavantam anupādhim anāmarūpam
vijñānam eva paramārthatayā prapannāḥ |
anye tridhātuparikalpanayā viśuddham
ūcuḥ svaśāstrasamayaṃ paripālayantaḥ || AvBhBhS_7

sāṃkhyaiḥ samastajagadudbhavakāraṇāni
proktāni yāni khalu sattvarajastamāṃsi |
rūpāṇi tāny api tavaiva samagraśakteḥ
kiṃ nātra yat parigataṃ bhuvi śaktibhis te || AvBhBhS_8

nityaṃ vināśipadarūpam anekam ekam
ugraṃ praśāntam aguṇaṃ guṇasaṃnibaddham |
saṃsāriṇaṃ vaśinam adhurvam asvatantram
evaṃ bhavantam asakṛt kavayaḥ stuvanti || AvBhBhS_9

vācām atītaviṣayo nirupākhyabhāvāt
prokto 'si śūnyam iti kaiścid asatpratijñaiḥ |
tvām eva kecid api vācakavācyayogāt
santaṃ viśeṣaṇavaśāt parikalpayanti || AvBhBhS_10

ādyantayos tribuvanasya bhavantam eva
yaṃ vaidikāḥ puruṣam āhur abhedam ādyam |
bhūyas tam eva jananapralayāntarāle
saṃsārajālam iti jātavikāram ūcuḥ || AvBhBhS_11

ātmānam ātmani yadā svayam ātmanaiva
saṃyamya tiṣṭhasi nimīlitasarvaśakte |
līnaṃ tadā tvayi jagat khalu tāvad āste
yāvat tavodbhavati nātha punaḥ sisṛkṣā || AvBhBhS_12

tvattaḥ paraṃ jagati nātha na cāsti kiṃcin
nāṇuḥ kvacin na ca mahān bhavataḥ sakāśāt |
sarvātmako 'si bhavataiva samastam etad
antaḥkṛtaṃ nanu jagan maṇineva sūtram || AvBhBhS_13

cetāṃsi yāni sukhaduḥkhaviśeṣabhāñji
ye ca pradhānapariṇāmavikārabhedāḥ |
tvaṃ deva janmani punaḥ pralaye ca teṣām
hetuḥ samastapayasām iva toyarāśiḥ || AvBhBhS_14

astās tvayā suraguro svatanu yadaiva
khātmānalānilajalāvanicandrasūryāḥ |
loke parasya bhavatā nanu kāraṇasya
mūle tadaiva nihitaḥ sakale kuṭhāraḥ || AvBhBhS_15

stauti prasahya tava ṣoḍaśadhā vibhajya
mūrtiṃ pramāṇaracano munir akṣapādaḥ |
dravyādivasturacanābhir upāttabhede
vaiśeṣike kaṇabhujāpi nanu stuto 'si || AvBhBhS_16

badhnāti kācid api śaktir anantaśakter
kṣetrajñam apratihatā bhavapāśajālaiḥ |
jñānāsinā ca vinikṛtya guṇān aśeṣān
anyā karoty abhimukhaṃ puruṣaṃ vimuktau || AvBhBhS_17

ekāṃ bata cyutasamastabhavapravṛttim
āhur vimuktim iti śāntatamām avasthām |
sthityudbhavapralayinīm aparām avasthām
saṃsāriṇīm iti vadanti tavaiva santaḥ || AvBhBhS_18

ajñānatīvratimiropahataprakāśās
tvaddūṣaṇaṃ prati vinaṣṭadhiyo 'pi santaḥ |
tāvat tyajanti na bhavaṃ bhagavaṃs tvayaiva
yāvat svaśaktikiraṇair na vibodhitāḥ syuḥ || AvBhBhS_19

guhyaṃ guhāśrayam ajam paramaṃ pavitram
ekaṃ vibhuṃ sakalavāṅmayabījam ādyam |
samyak prayuktam abhivāñchitahtubhūtam
āhur bhavantam apare nanu śabdatattvam || AvBhBhS_20

tīrthakriyāvyasaninaḥ svamanīṣikābhir
urprekṣya tattvam iti yad yad amī vadanti |
tat tattvam eva bhavato 'sti na kiṃcid anyat
saṃjñāsu kevalam ayaṃ viduṣāṃ vivādaḥ || AvBhBhS_21

sarvajñabījam avikāram aluptaśaktim
niḥśreyasābhyudayamārgavidhānahetum |
tvām eva deva guravaḥ prathame 'pi samyag
ārādhya tīrthakarabhā mahimānam āpuḥ || AvBhBhS_22

sarvajñātā yad api lakṣaṇayā parasya
mukhyā tathāpi bhavataḥ parameśvaratvāt |
svātantryam apy anupacāram upaiti yogam
tvayy eva nātha jagataḥ khalu kartṛbhāvāt || AvBhBhS_23

dṛśyena kaścid api gacchati vastujātam
anyo 'numānasamayair aparo 'pi śabdaiḥ |
pratyakṣavastu bhavataḥ punar akrameṇa
sarvaṃ karāmalakavad viditaṃ prameyam || AvBhBhS_24

asyātmano viṣayiṇaḥ paratantravṛtter
anyaś ca nātha jagataḥ prakṛteḥ parasya |
saṃyojane ca viratau ca paro 'si hetuḥ
saṃsāracakraparivartanayantravāhaḥ || AvBhBhS_25

kurvan muhuḥ svayam atandritayāpi buddhyā
karmāṇi śāstraviṣayopanibandhanāni |
saṃyujyate samucitena tu yatphalena
tacceṣṭitasya phalam apratimaṃ tavaiva || AvBhBhS_26

utsāhaśaktirahitān vikalān apuṇyān
mandān nirastasamayānn aghṛṇānn asatyān |
avāñchitena viniyojayatā phalena
luptas tvayā puruṣakāraviśeṣavāda || AvBhBhS_27

karmāṇi vedavihitāni sukhapradāni
pretyaiti tatphalam idaṃ phalam antavac ca |
tvacchāsane sukham anantam aśeṣadoṣa-
ploṣāya bhaktivihitām praṇatiṃ yad āhuḥ || AvBhBhS_28

prākāmyam ātmani yadā prakaṭīkaroṣi
vyaktīḥ pratikṣaṇam apūrvatayā dadhānaḥ |
tvayy eva so 'pi bhagavan bhajate 'rthavattām
prayo 'vidagdharacitaḥ kṣaṇabhaṅgavādaḥ || AvBhBhS_29

yat tīrthikair jagati janmabhir aprameyair
nāsādyate padam iti svamateṣu gītam |
buddhyaikajanmikam iti bruvatāṃ vigṛhya
yeṣāṃ tvayā nanu kṛtaś caraṇaḥ śiraḥsu || AvBhBhS_30

lubdhā malīmasadhiyaḥ samayād apetā
rāhoparaktamanaso vaśino 'py asantaḥ |
tvacchāsane vihitaliṅgaparigraheṇa
mucyanta ity atimahāṃs tava siṃhanādaḥ || AvBhBhS_31

avyāhatasya bhagavan bhavadāgamasya
cintāmaṇer iva mahān asamaḥ prabhāvaḥ |
samyag vidhānavihitāṃ yad avāpya dīkṣāṃ
jñānād ṛte 'pi khalu kevalatām upaiti || AvBhBhS_32

jñānaṃ tiraḥkṛtam idam paśuvāsanābhir
āstāṃ yad ātmani vimuktiphalasya bījam |
uddhāriṇeva bhagavan bhavadāgamena
sampāditaṃ bhavati mokṣaphalaprapūrtyai || AvBhBhS_33

jantor yadā tava kadācid anugrahecchā
kṣīṇāśayo bhavati janmabhir aprameyaiḥ |
saṃsārajālam ativāhya tavaiva śāntim
ātyantikīṃ vrajati bodhavivarjito 'pi || AvBhBhS_34

etac caturdaśavidhaṃ bhuvanaṃ samastam
saṃsāramaṇḍalam avāntarabhedabhinnam |
tvam pāsi haṃsi vidadhāsi yādṛcchayeti
matvā na lipyata iti pravadanti santaḥ || AvBhBhS_35

aiśvaryam apratihataṃ sahajo virāgas
tṛptir nisargajanitā vaśitendriyeṣu |
ātyantikaṃ sukhaṃ anāvaraṇā ca śaktir
jñānaṃ ca sarvaviṣayaṃ bhagavaṃs tavaiva || AvBhBhS_36

yatnād upāttatamaso 'pi hi yad durāpam
ātyantikaṃ sukham apāstasamastaduḥkham |
nītāḥ kharoṣṭrataravo 'pi tad ity aho te
svātantryam apratihataṃ bhuvanatraye 'pi || AvBhBhS_37

yenāmalasphuritaratnaśikhāvitāno
haimīkṛto nipatatā sakalaḥ sumeruḥ |
tasyātulaṃ phalam idaṃ tava śūkrabindor
ekasya yat kanakabhūṣaṇam āpa lokaḥ || AvBhBhS_38

kālena saṃcitam apuṇyam anantakalpaṃ
lokatrayasya yad abhūt tripuraprakāram |
dagdhaṃ tvayā tad iti samyag avetya kasya
mūḍhād ṛte bhavati na tvayi pakṣapātaḥ || AvBhBhS_39

kṣīrodasāramathanapratilabdhajanma
vitrāsitatridaśasaṃhati kālakūṭam |
nirmatsareṇa pibatā jagato hitāya
pītas tvayaiva sakalo nanu sādhuvādaḥ || AvBhBhS_40

śāntātmanāpi bhavatā bhagavan prasahya
netrodbhavena dahatā dahanena kāmam |
alpīyaso 'pi mahatāṃ samatikramasya
manye janāya viṣamaḥ kathito vipākaḥ || AvBhBhS_41

snehād vidhāya dayitāṃ vapuṣo 'rdhabhāge
dhuryas tathāpi bhagavañ chamināṃ tvam eva |
trailokyavismayakṛtāṃ tava ceṣṭitānām
adyāpi kaścid api nānukṛtiṃ karoti || AvBhBhS_42

uccais tiraḥkṛtam idam bhuvanaṃ samastaṃ
yogaprabhāvajanitena balena yena |
tasya prajāpatisutasya hṛtaḥ prasahya
garvas tvayeti bata kasya na vismayo 'tra || AvBhBhS_43

aṅguṣṭhakena bhavatā vinipīḍitasya
yasyāsavo na vigatāḥ sahasā kathaṃcit |
yatnāt sa eva vijito hariṇā cireṇa
nītyā daśānana iti kva nu vismayo 'yam || AvBhBhS_44

mandākinī kanakapaṅkajapārijāta-
puṣpādhivāsitajalā nabhasaḥ patantī |
lagnā tuṣārakaṇikeva jaṭāgrabhāge
kenāpareṇa bhavateva dhṛtānugṛhya || AvBhBhS_45

āstāṃ tavānyad api tāvad atulyakakṣyam
aiśvaryam īśvarapadasya nimittabhūtam |
tvacchepaso 'pi bhagavan na gato 'vasānaṃ
viṣṇuḥ pitāmahayutaḥ kim utāparasya || AvBhBhS_46

śvetasya mṛtyudamanāntaravartino 'pi
sūnāpaśor iva vadhāvasare sthitasya |
trāṇaṃ nigṛhya bhavatā yad akāri tasya
tat kasya vismayam alaṃ na karoti loke || AvBhBhS_47

prītena yadvad upamanyur apāstamanyuḥ
kṣīrodasaṃvibhajanena kṛtas tvayāsau |
tadvad vibho yadi jagaty aparo 'si kaścin
nirmucya matsaram amī pravadanti santaḥ || AvBhBhS_48

vṛtradviṣaḥ sakuliśasya bhujasya śaktir
uttambhitā vihasatā bhavatā tathaiva |
pūṣṇas tathaiva daśaneṣu bhagasya cākṣṇor
dakṣasya ca kratuphale mamatā nirastā || AvBhBhS_49

viṣṇuprajāpatipurandaralokapālais
tiryaksurāsuranarair aparaiś ca divyaiḥ |
loke yathā paśupate tava kalpitāni
sthānāni tadvad aparasya vadantu kasya || AvBhBhS_50

śakrātmajasya nijaśārṅgarathāṅgapāṇau
kṛṣṇe sthite 'pi śakalīkṛtadānavendre |
droṇāpageyakṛpakarṇabhayārditasya
śāṃ śāṃkara tvam akṛtha bhṛśam arjunasya || AvBhBhS_51

ārādhitena bhagavan bhavatā hiraṇya-
vṛṣṭiṃ maruttanṛpateḥ kiratā yiyakṣoḥ |
ye khyāpitā jagati bhaktajanaprasādās
tan nāstutaṃ tava vibho parameśvaratvam || AvBhBhS_52

tīvravratasya kaṇadhūmanipātatapta-
sarvendriyasya bhavatā bhṛgunandanasya |
tuṣṭena śarma yad akāri tadā sa śukraḥ
śītoṣṇavātajaladair divi bhāsamānaḥ || AvBhBhS_53

etāni pāsi bhuvanāni yadā vigṛhya
seyaṃ vibhūtir atulā tava tāvad āstām |
dakṣaprasūtim api te bhvanatraye 'smin
kaścin na vetti bhavatā saha ko vivādaḥ || AvBhBhS_54

unmārgavarti guṇadoṣavivekamandam
ugraṃ malīmasam asaṃyatam alpasāram |
bhītārthināśana dayāpara lokanātha
deva prasīda mama cittam idaṃ praśādhi || AvBhBhS_55

etāni deva capalāni durāśayāni
lubdhāni ramyaviṣayopanibandhanāni |
durdāntavājisadṛśāny avidheyabhāvād
vaśyāni me kuru sadaiva ṣaḍindriyāni || AvBhBhS_56

nandīśvarasya manujasya sato 'tikāṣṭhaṃ
kālena mṛtyum acireṇa ninīṣitasya |
sarvātmanā samatayā yad akāri tuṣṭyā
nāścaryam etad abhavan na ca bhāvi nāsti || AvBhBhS_57

saṃsārapāśavaśam etad anīśam īśa
mithyā kutarkatimiropahataprakāśam |
ceto mama kṣapitamanmatha dagdhakāla
satsevite pathi niyojaya devadeva || AvBhBhS_58

kāyānubandhibhir anekavidhair apāyai
rāgādibhiś ca manasi pratilabdhabhāvaiḥ |
mūḍhaḥ pṛthak pṛthag aham pravilupyamānas
tvattaḥ paraṃ kathaya kaṃ śaraṇaṃ vrajāmi || AvBhBhS_59

āyāsakena khalu kāmapiśācakena
krodhagraheṇa ca punar niravagraheṇa |
grastasya viklavadhiyaḥ pravimuktihetor
yat kṛtyam atra mama tatra tavaiva śaktiḥ || AvBhBhS_60

yā sā jagatparibhavasya nimittabhūtā
hetuḥ svayaṃ surapater api lāghavasya |
sā māṃ viḍambayati nātha sadaiva tṛṣṇā
bhindhi prasahya bhagavan na punarbhavāya || AvBhBhS_61

yenāvṛtaḥ paśur ayaṃ hṛtabodhaśaktis
tattvaṃ na vetti jagate hitam ātmane vā |
chindhi prasahya bhagavan mama tat samastam
ajñānajaṃ timiram astu mahāprakāśaḥ || AvBhBhS_62

sarvāpadāṃ nilayam adhruvam asvatantram
āsannapātam avivekam asārasaṃjñam |
yāvac charīrakam idam na vipadyate me
tāvan niyojaya vibho kuśalakriyāsu || AvBhBhS_63

yat khidyate kamalayonir api stuvānaḥ
sākṣāc caturbhir api nāma mukhair bhavantam |
tat ke vayaṃ tava guṇastavanakriyāsu
bhaktiḥ pramāṇam iti sarvam idaṃ kṣamasva || AvBhBhS_64

kṛtvā mayā tava nutiṃ jagadekabandho
bhaktyā svabuddhisadṛśīm avadhūtanāmna |
puṇyaṃ yad alpam api kiṃcid upāttam atra
lokasya tena bhagavaṃs tvayi bhaktir astu || AvBhBhS_65

iti śrīmadavadhūtasiddhaviracitaṃ bhagavadbhaktistotraṃ samāptam ||