Maitreyavyākaraṇa

1. Gilgit Manuscript Majumder, Prabhas Chandra (1959), Ārya Maitreya-vyākaraṇam, Calcutta (also published in Nalinaksha Dutt, Gilgit Manuscripts, vol. IV, Calcutta 1959, pp. xxix ff. and 185 ff., under P.C. Mazumder). The first folios of the Skt. text containing verses 1-30 are missing. All the sandhis are standardized.

(daśa māsāṃś ca) nikhilān dhārayitvā mahādyutim
supuṣpite 'smin udyāne maitreyajananī tataḥ // MvyG_31

na niṣaṇṇā nipannā vā sthitā sā dharmacāriṇī
drumasya śākhām ālambya maitreyaṃ janayiṣyati // MvyG_32

alipto garbhapaṅkena kuśeśayam ivāmbunā
traidhātukam idaṃ sarvaṃ prabhayā pūrayiṣyati // MvyG_33

prīto 'tha taṃ sahasrākṣo devarājā śacīpatiḥ
jāyamānaṃ grahītā sa maitreyaṃ dvipadottamam // MvyG_34

padāni jātamātraś ca saptāsau prakramiṣyati
pade pade nidhanaṃ ca padmaṃ padmaṃ bhaviṣyati // MvyG_35

diśaś catasraś codvīkṣya vācaṃ pravyāhariṣyati
iyaṃ me paścimā jātir nāsti bhūyaḥ punarbhavaḥ
na punar abhyāgamiṣyāmi nirvāsyāmi nirāsravaḥ // MvyG_36

saṃsārārṇavamagnānāṃ sattvānāṃ duḥkhabhāginām
tṛṣṇābandhanabaddhānāṃ kariṣyāmi vimocanam // MvyG_37

śvetaṃ cāsya surāś chattraṃ dhārayiṣyanti mūrdhani
śītoṣṇavāridhārābhyāṃ nāgendrau snāpayiṣyataḥ // MvyG_38

pratigṛhya ca taṃ dhātrī dvātriṃśadvaralakṣaṇam
śriyā jvalantaṃ maitreyaṃ mātre samupaneṣyati // MvyG_39

manoramāṃ ca śivikāṃ nānāratnavibhuṣitām
ārūḍhāṃ putrasahitāṃ vahiṣyanti ca devatā // MvyG_40

tatas tūryasahasreṣu vādyamāneṣu tatpuram
praviṣṭamātre maitreye puṣpavarṣaṃ patiṣyati // MvyG_41

dṛṣṭvaivaṃ putraṃ subrahmā dvātriṃśadvaralakṣaṇam
pratyavīkṣātha mantreṣu tadā prīto bhaviṣyati // MvyG_42

gatidvayaṃ kumārasya yathā mantreṣu dṛśyate
narādhipaś cakravartī buddho vā dvīpadottamaḥ // MvyG_43

sa ca yauvanasaṃprāpto maitreyāḥ puruṣottamaḥ
cintayiṣyati dharmātmā duḥkhitā khalv iyāṃ prajāḥ // MvyG_44

brahmasvaro mahāghoṣo hemavarṇo mahādyutiḥ
viśālavakṣāḥ pīnāṅsaḥ padmapattranibhekṣaṇaḥ // MvyG_45

hastaḥ pañcāśad ucchrāya tasya kāyo bhaviṣyati
visṛtaś ca tato 'rddhena śubhavarṇasamucchrayaḥ // MvyG_46

aśītibhiś caturbhiś ca sahasraiḥ saṃpuraskṛtaḥ
māṇavānāṃ sa maitreyo mantrān adhyāpayiṣyati // MvyG_47

atha śaṅkho narapatiḥ yūpam ucchrāpayiṣyati
tiryañ ca ṣoḍaśavyāmam ūrdhvaṃ vyāmasahasrakam // MvyG_48

sa taṃ yūpaṃ narapatir nānāratnavibhūṣitam
pradāsyati dvijātibhyo yajñaṃ kṛtvā puraḥsaram
saptaratnamayaṃ yūpaṃ brāhmaṇebhyaḥ pradāsyati // MvyG_49

taṃ ca ratnamayaṃ yūpaṃ dattamātraṃ manoramam
brāhmaṇānāṃ sahasrāṇi vikiriṣyanti tatkṣaṇāt // MvyG_50

yūpasya tasya maitreyo dṛṣṭvā caitām anityatām
kṛtsnaṃ vicintya saṃsāraṃ pravrajyāṃ rocayiṣyati // MvyG_51

yatv ahaṃ pravrajitveha spṛśeyam amṛtaṃ padam
vimocayeyaṃ janatāṃ vyādhimṛtyujarābhayāt // MvyG_52

aśītibhiḥ sahasraiḥ sa caturbhiś ca puraskṛtaḥ
niṣkramiṣyati maitreyaḥ pravrajyām agrapudgalaḥ // MvyG_53

nāgavṛkṣas tadā tasya bodhivṛkṣo bhaviṣyati
pañcāśadyojanāny asya śākhā ūrdhvaṃ samucchritāḥ // MvyG_54

niṣadya tasya cādhastān maitreyo puruṣottamaḥ
anuttarāṃ śivāṃ bodhiṃ samavāpsyati nāyakaḥ // MvyG_55

yasyām eva ca rātrau sa pravrajyāṃ niṣkramiṣyati
tasyām eva ca rātrau hi parāṃ bodhim avāpsyati // MvyG_56

aṣṭāṅgopetayā vācā tataḥ sa puruṣottamaḥ
deśayiṣyati saddharmaṃ sarvaduḥkhāpahaṃ śivam // MvyG_57

prasannāṃ janatāṃ dṛṣṭvā satyāni kathayiṣyati
duḥkhaṃ duḥkhasamutpādaṃ duḥkhasya samatikramam // MvyG_58

āryaṃ cāṣṭāṅgikaṃ mārgaṃ kṣemaṃ nirvāṇagāminam
taṃ cāpi dharmaṃ saṃśrutya pratipatsyanti śāsane // MvyG_59

udyāne puṣpasaṃcchanne sannipāto bhaviṣyati
pūrṇaṃ ca yojanaśataṃ parṣat tasya bhaviṣyati // MvyG_60

śrutvā narapati rājā śaṅkho nāma mahāyaśāḥ
dattvā dānam asaṃkhyeyaṃ pravrajyāṃ niṣkramiṣyati // MvyG_61

aśītibhiś caturbhiś ca sahasraiḥ parivāritaḥ
narādhipo viniṣkramya pravrajyām upayāsyati // MvyG_62

anenaiva pramāṇena mānavānāṃ puraskṛtaḥ
maitreyasya pitā tatra pravrajyām niṣkramiṣyati // MvyG_63

tato gṛhapatis tatra sudhano nāma viśrutaḥ
pravrajiṣyati śuddhātmā maitreyasyānuśasane // MvyG_64

strīratnam atha śaṅkhasya viśākhā nāma viśrutā
aśītibhiś caturbhiś ca sahasraiḥ saṃpuraskṛtā
nārīṇāṃ abhiniṣkramya pravrajyām rocayiṣyati // MvyG_65

prāṇinaḥ tatra samaye sahasrāṇi śatāni ca
pravrajyām upayāsyanti maitreyasyānuśāsane // MvyG_66

supuṣpite 'smin udyāne sannipāto bhaviṣyati
samantato yojanaśataṃ parṣat tasya bhaviṣyati // MvyG_67

tataḥ kāruṇikaḥ śāstā maitreyaḥ puruṣottamaḥ
samitiṃ vyavalokyātha idam arthaṃ pravakṣyati // MvyG_68

sarve te śākyasiṃhena guṇiśreṣṭhena trāyinā
arthato lokanāthena dṛṣṭvā saddharmadhātunā
ropitā mokṣamārgeṇa vikṣiptā mama śāsane // MvyG_69

chattradhvajapatākābhir gandhamālyavilepanaiḥ
kṛtvā stūpeṣu satkāram āgatā hi mamāntikam // MvyG_70

saṅghe dattvā ca dānāni cīvaraṃ pānabhojanam
vividhaṃ glānabhaiṣajyam āgatā hi mamāntikam // MvyG_71

kuṅkumodakasekaṃ ca candanenānulepanam
dattvā śākyamuneḥ stūpeṣv āgatā hi mamāntikam // MvyG_72

śikṣāpadāni cādāya śākyasiṃhasya śāsane
paripālya yathābhūtam āgatā hi mamāntikam // MvyG_73

upoṣadham upoṣyeha āryam aṣṭāṅgikaṃ śubham
caturdaśīṃ pañcadaśīṃ pakṣasyehāṣṭamīṃ tathā
prātihārikapakṣaṃ cāpy aṣṭāṅgaṃ susamāhitam // MvyG_74

śīlāni ca samādāya saṃprāptāni ca śāsanam
buddhaṃ dharmaṃ ca saṅghaṃ ca sattvās te śāsanaṃ gatāḥ
kṛtvā ca kuśalaṃ karma macchāsanam upāgatāḥ // MvyG_75

tenaite preṣitāḥ sattvāḥ pratīṣṭāś ca mayāpy amī
gaṇiśreṣṭheṇa muninā parītā bhūrimedhasā // MvyG_76

prasannāṃ janatāṃ dṛṣṭvā satyāni kathayiṣyati
śrutvā ca te tato dharmaṃ prāpsyanti padam uttamam // MvyG_77

prātihāryatrayeṇāsau śrāvakān vinayiṣyati
sarve te asravās tatra kṣipayiṣyanti suratāḥ // MvyG_78

prathamaḥ sannipāto 'sya śrāvakāṇāṃ bhaviṣyati
pūrṇāḥ ṣaṇnavatikoṭyaḥ śrāvakāṇāṃ bhavacchidām // MvyG_79

dvitīyaḥ sannipāto 'sya śrāvakāṇāṃ bhaviṣyati
pūrṇāś caturnavatiḥ koṭyaḥ śāntānāṃ bhūrimedhasām // MvyG_80

tṛtīyaḥ sannipāto 'sya śrāvakāṇāṃ bhaviṣyati
pūrṇā dvāviṃśatiḥ koṭyaḥ śāntānāṃ śāntacetasām // MvyG_81

dharmacakraṃ pravartyātha vinīya suramānuṣān
sārdhaṃ śrāvakasaṅghena pure piṇḍaṃ cariṣyati // MvyG_82

tataḥ praviśatas tasyāṃ ramyāṃ ketumatīṃ purīm
māndārakāṇi puṣpāni patiṣyanti purottame
devatāḥ prakariṣyanti tasmin puragate munau // MvyG_83

catvāraś ca mahārājāḥ śakraś ca tridaśādhipaḥ
brahmā devagaṇaiḥ sārdhaṃ pūjāṃ tasya kariṣyati // MvyG_84

utpalaṃ kumudaṃ padmaṃ puṇḍarīkaṃ sugandhikam
aguruṃ candanaṃ cāpi divyaṃ mālyaṃ patiṣyati // MvyG_85

cailakṣepaṃ kariṣyanti devaputrā maharddhikāḥ
taṃ lokanātham udvīkṣya praviśantaṃ purottamam // MvyG_86

divyaś ca tūryanirghoṣo divyaṃ mālyaṃ patiṣyati
devatā prakariṣyanti tasmin puragate munau // MvyG_87

ye tu ketumatīṃ ke cid vāsayiṣyanti mānuṣāḥ
te pi taṃ pūjayiṣyanti praviśantaṃ purottamam // MvyG_88

pathi bhūmyāstaraṃ tatra mṛdutūlapicopamam
vicitraṃ ca śubhaṃ mālyaṃ vikiriṣyanti te tadā // MvyG_89

chattradhvajapatākābhir arcayiṣyanti mānuṣāḥ
śubhaiś ca tūryanirghoṣaiḥ prasannamanaso narāḥ // MvyG_90

taṃ ca śakraḥ sahasrākṣo devarājaḥ śacīpatiḥ
prahṛṣṭaḥ prāñjalirbhūtvā maitreyaṃ stoṣyate jinam // MvyG_91

namas te puruṣājanya namas te puruṣottama
anukampasva janatāṃ bhagavann agrapudgala // MvyG_92

maharddhiko devaputras tasya māro bhaviṣyati
sa cāpi prāñjalirbhūtvā stoṣyate lokanāyakam // MvyG_93

śuddhāvāsasahasraiś ca bahubhiḥ parivāritaḥ
pravekṣyate ca maitreyo lokanātho vināyakaḥ // MvyG_94

brāhmaṇaparivāreṇa brahmā cāpi girāsphuṭam
kathayiṣyati saddharmaṃ brahmaṃ ghoṣam udīrayan // MvyG_95

ākīrṇā pṛthivī sarvā arhadbhiś ca bhaviṣyati
kṣīṇāsravair vāntadoṣaiḥ prahīṇabhavabandhanaiḥ // MvyG_96

hṛṣṭā devamanuṣyāś ca gandharvā yakṣarākṣasāḥ
śāstuḥ pūjāṃ kariṣyanti nāgāś cāpi maharddhikāḥ // MvyG_97

te vai nūnaṃ bhaviṣyanti cyānaghāś (?) chinnasaṃcayāḥ
utkṣiptaparikhāḥ dhīrā anādānā nirutsakāḥ
brahmacaryaṃ cariṣyanti maitreyasyānuśasane // MvyG_98

te 'pi nūnaṃ bhaviṣyanti amamā aparigrahāḥ
ajātarūparajatā aniketā asaṃstavāḥ
brahmacaryaṃ cariṣyanti ye maitreyānuśasane // MvyG_99

te vai pānaṃ gamiṣyanti chitvā jālam eva bhujāt
dhyānāni copasaṃpadya prītisaukhyasamanvitāḥ
brahmacaryaṃ cariṣyanti maitreyasyānuśasane // MvyG_100

ṣaṣṭiṃ varṣasahasrāṇi maitreyo dvipadottamaḥ
deśayiṣyati saddharmaṃ śāstā lokānukampayā // MvyG_101

śatāni ca sahasrāṇi prāṇinaṃ sa vināyakaḥ
vinīya dharmakāyena tato nirvāṇam eṣyati // MvyG_102

tasmiṃś ca nirvṛte dhīre maitreye dvipadottame
daśavarṣasahasrāṇi saddharmaḥ sthāsyati kṣitau // MvyG_103

prasādayati cittāni tasmāc chākyamunau jine
tato dṛkṣatha maitreyaṃ saṃbuddhaṃ dvipadottamam // MvyG_104

tasmād dharme ca buddhe ca saṅghe cāpi gaṇottame
prasādayati cittāni bhaviṣyati maharddhikam // MvyG_105

taṃ tādṛśaṃ kāruṇikaṃ maitreyaṃ dvipadottamam
ārādhayitvā kālena tato nirvāṇam eṣyatha // MvyG_106

idam āścaryakaṃ śrutvā dṛṣṭvā ca vibhavānalpikām
ko vidvān na prasīdeta api kṛṣṇāsu jātiṣu // MvyG_107

tasmād ihātmakāmena māhātmyam abhikāṅkṣatāḥ
saddharmo gurukartavyaḥ smaratā buddhaśāsanam // MvyG_108

Maitreyavyākaraṇaṃ samāptam //

2. Calcutta Manuscript (incomplete), ed. Lévi Sylvain Lévi, "Maitreya le consolateur", Études d'orientalisme publiées par le Musée Guimet a la mémoire de Raymonde Linossier, Paris 1932, pp. 384-389 The first two folios of the Skt. text containing verses 1-25ab are missing. All the sandhis are standardized.

elāpattraś ca gāndhāre śaṅkho vārāṇasīpure // MvyC_25

caturbhir ebhir nidhibhiḥ sa rājā susamanvitaḥ
bhaviṣyati mahāvīraś śatapuṇyabaloditaḥ // MvyC_26

brāhmaṇas tasya rājñaś ca subrāhmaṇaḥ purohitaḥ
bahuśrutaś caturvedas tasyopadhyāyo bhaviṣyati // MvyC_27

adhyāpako mantradharaḥ smṛtimān vedapāragaḥ
kaiṭābhe sa nirghaṇṭe ca padavyākaraṇe tathā // MvyC_28

tadā brahmāvatī nāma tasya bhāryā bhaviṣyati
darśanīyā prāsādikā abhirūpā yaśasvinī // MvyC_29

tuṣitebhyaś cyavitvā tu maitreyo hy agrapudgalaḥ
tasyāḥ kukṣau sa niyataṃ pratisandhiṃ grahīṣyati // MvyC_30

daśa māsāṃś ca nikhilān dhārayitvā mahādyutiḥ
supuṣpite ca udyāne gatvā maitreyamātarā // MvyC_31

na niṣaṇṇā na suptāsau sthitā sā dharmacāriṇī
drumasya śākhām ālambya maitreyaṃ janayiṣyati // MvyC_32

niṣkramiṣyati pārśvena dakṣiṇena narottamaḥ
abhrakūṭād yathā sūryo nirgataś ca prabhāsate // MvyC_33

alipto garbhapaṅkena padmaṃ caiva yathāmbhasā
traidhātukam idaṃ sarvaṃ prabhayā pūrayiṣyati // MvyC_34

atha prītas sahasrākṣo devarājaś śacīpatiḥ
grahīṣyati kumāraṃ taṃ jāyamānaṃ narottamam // MvyC_35

śriyā jvalantaṃ maitreyaṃ dvātriṃśadvaralakṣaṇam
muñca muñca sahasrākṣa jātamātro vadiṣyati // MvyC_36

padāni jātamātras tu saptāsau prakramiṣyati
pade pade nidhanaṃ ca padmaṃ padmaṃ bhaviṣyati // MvyC_37

diśaś catasraś codvīkṣya vācaṃ pravyāhariṣyati
iyaṃ me paścimā jātir nāsti bhūyaḥ punarbhavaḥ // MvyC_38

na punar āgamiṣyāmi nirvāsyāmi nirāśravaḥ
śītoṣṇavāridhārābhis snāpayiṣyanti pannagāḥ // MvyC_39

divyāmbarāṇi puṣpāṇi patiṣyanti nabhastalāt
śvetaṃ tasya surāś chattraṃ dhārayiṣyanti mūrdhani // MvyC_40

hṛṣṭaś caiva sahasrākṣo devarājo śacīpatiḥ
grahīṣyati taṃ kumāraṃ dvātriṃśadvaralakṣaṇam
śriyā jvalantaṃ maitreyaṃ mātur haste pradāsyati // MvyC_41

manoramāṃ ca śivikāṃ nānāratnavibhuṣitām
ārūḍhā putrasahitā vahiṣyate ca devavat // MvyC_42

tatas tūryasahasreṣu vādyamāneṣu tatpuram
praviṣṭamātre maitreye puṣpavarṣaṃ patiṣyati // MvyC_43

tasmiṃś ca divase bhāryā gurviṇyaḥ prasaviṣyanti
sarvās tā janayiṣyanti putrān kṣemeṇa svastinā // MvyC_44

dṛṣṭvā ca putraṃ subrahmā dvātriṃśadvaralakṣaṇam
pratyavekṣya ca mantreṣu tataḥ prīto bhaviṣyati // MvyC_45

gatidvayaṃ kumārasya yathā mantreṣu dṛśyate
narādhipaś cakravartī buddho vā dvīpadottamaḥ // MvyC_46

sa ca yauvanasaṃprāpto maitreyo hy agrapudgalaḥ
cintayiṣyati dharmātmā duḥkhitāh khalv imāḥ prajāḥ // MvyC_47

brahmasvaro mahāghoṣo hemavarṇo mahādyutiḥ
viśālavakṣāḥ pīnāṅgaḥ padmapattranibhekṣaṇaḥ // MvyC_48

samucchrayeṇa hastāśītis tasya kāyo bhaviṣyati
vistāraṃ viṃśahastāni tato 'rdham mukhamaṇḍalam // MvyC_49

aśītibhiś caturbhiś ca sahasraiḥ sa puraskṛtaḥ
māṇavānāṃ ca maitreyo maṃtrān adhyāpayiṣyati // MvyC_50

tataḥ śaṅkho mahārājo yūpam ucchrāpayiṣyati
ṣoḍaśavyāmavistāram ūrdhvaṃ vyāmasahasrakam // MvyC_51

sa taṃ yūpaṃ narapatir nānāratnavibhūṣitam
pradāsyati dvijātibhyo yajñaṃ kṛtvā purassaram
saptaratnamayaṃ yūpaṃ brāhmaṇebhyaḥ pradāsyati // MvyC_52

taṃ ca ratnamayaṃ yūpaṃ dattamātraṃ manoramam
brāhmaṇānāṃ sahasrāṇi vikariṣyanti tatkṣaṇāt // MvyC_53

tasya yūpasya maitreyo dṛṣṭvā cainām anityatām
kṛtsnaṃ vicintya saṃsāraṃ pravrajyāṃ rocayiṣyati // MvyC_54

yatrāhaṃ pravrajitveha spṛśeyam amṛtaṃ padam
vimocayeyaṃ janatāṃ vyādhimṛtyujarābhayāt // MvyC_55

aśītibhiś caturbhiś ca sahasraiḥ sa puraskṛtaḥ
niṣkramiṣyati maitreyaḥ pravrajyām agrapudgalaḥ // MvyC_56

nāgavṛkṣas tadā tasya bodhivṛkṣo bhaviṣyati
pañcāśadyojanās tasya ūrdhvaṃ śākhāḥ samudgatāḥ
ṣaṭkrośaviṭapāṇy asya vivṛtāni samantataḥ // MvyC_57

tasya mūle niṣaṇṇo 'sau maitreyo dvipadottamaḥ
anuttarāṃ ca saṃbodhiṃ prāpsyati nātra saṃśayaḥ // MvyC_58

aṣṭāṅgopetayā vācā tataḥ sa munisattamaḥ
deśayiṣyati saddharmaṃ sarvaduḥkhāpahaṃ śivam // MvyC_59

duḥkhaṃ duḥkhasamutpādaṃ duḥkhasya samatikramam
āryaṃ cāṣṭāṅgikaṃ mārgaṃ kṣemaṃ nirvāṇagāminam // MvyC_60

prasannān janatāṃ dṛṣṭvā satyāni kathayiṣyati
taṃ cāsya dharmaṃ saṃśrutya pratipadyanti śāsane // MvyC_61

supuṣpite ca udyāne sannipāto bhaviṣyati
pūrṇaṃ ca yojanaṃ śataṃ parṣat tasya bhaviṣyati // MvyC_62

tataḥ śrutvā narapatiḥ śaṅkho rājā mahāyaśāḥ
dattvā dānam asaṃkhyeyaṃ pravrajyāṃ rocayiṣyati // MvyC_63

aśītibhiś caturbhiś ca sahasraiḥ sa puraskṛtaḥ
narādhipo viniṣkramya pravrajyām upayāsyati // MvyC_64

tenaiva ca pramāṇena mānavānāṃ puraskṛtaḥ
maitreyasya pitā caiva pravrajyām upayāsyati // MvyC_65

tato gṛhapatiḥ x x sudhano nāma viśrutaḥ
pravrajiṣyati dharmātmā sahasraiḥ parivāritaḥ // MvyC_66

strīratnam atha śaṅkhasya viśākhā nāma viśrutā
aśītibhiś caturbhiś ca sahasraiḥ sā puraskṛtā
nārīṇāṃ saha niṣkramya pravrajyām upayāsyati // MvyC_67

prāṇināṃ tatra samaye sahasrāṇi śatāni ca
pravrajyām upayāsyanti maitreyasyānuśāsane // MvyC_68

tataḥ kāruṇikaḥ śāstā maitreyo dvipadottamaḥ
samitiṃ vyavalokyātha idam arthaṃ pravakṣyati // MvyC_69

sarve te śākyamuninā muniśreṣṭhena tāyinā
arthato lokanāthena dṛṣṭāḥ saddharmadhātunā
ropitā mokṣamārgaṇe vikṣiptā mama śāsane // MvyC_70

chattradhvajapatākābhir gandhamālyānulepanaiḥ
kṛtvā śākyamuneḥ pūjāṃ hy āgatā mama śāsane // MvyC_71

kuṅkumodakarasena candanenānulepanam
dattvā śākyamuneḥ stūpe hy āgatā mama śāsane // MvyC_72

buddhaṃ dharmaṃ ca saṅghaṃ ca gatvā tu śaraṇaṃ sadā
kṛtvā tu kuśalaṃ karma āgatā mama śāsane // MvyC_73

śikṣāpadāni samādāya x śākyamuniśāsane
pratipālya yathābhūtaṃ hy āgatā mama śāsane // MvyC_74

dattvā saṅghe ca dānāni cīvarapānabhojanam
vicitraṃ glānabhaiṣajyaṃ hy āgatā mama śāsane // MvyC_75

caturdaśīṃ pañcadaśīṃ pakṣasyehāṣṭamīṃ tathā
prātihārakapakṣaṃ ca aṣṭāṅgaṃ susamāhitam
upavāsam upoṣitvā hy āgatā mama śāsane // MvyC_76

prātihāryatrayeṇāsau śrāvakān vedayiṣyati
sarve te hy asravān dharmān kṣapayiṣyanti x x x // MvyC_77

prathamaḥ sannipāto 'sya śrāvakāṇāṃ bhaviṣyati
pūrṇāḥ ṣaṇnavatiḥ koṭyaḥ śrāvakāṇāṃ bhavacchidām // MvyC_78

dvitīyaḥ sannipāto 'sya śrāvakāṇāṃ bhaviṣyati
pūrṇāś caturnavatiḥ koṭyo muktānāṃ kleśabandhanāt // MvyC_79

tṛtīyaḥ sannipāto 'sya śrāvakāṇāṃ bhaviṣyati
pūrṇā dvānavatiḥ koṭyo muktānāṃ śāntacetasām // MvyC_80

dharmacakraṃ pravartyātha vinīya suramānuṣān
sārdhaṃ śrāvakasaṅghena pure piṇḍaṃ cariṣyati // MvyC_81

tataḥ praviśatas tasya ramyāṃ ketumatīpurīm
māndāravāṇi puṣpāni patiṣyanti narottame
devatāḥ prakariṣyanti tasmin puragate munau // MvyC_82

catvāraś ca mahārājāḥ śakraś ca tridaśādhipaḥ
brahmadevagaṇaiḥ sārdhaṃ pūjāṃ tasya kariṣyati // MvyC_83

utpalakumudapadmapuṇḍarīkasugandhikam
aguruṃ candanaṃ caiva divyamālās tathaiva ca // MvyC_84

cailakṣepaṃ kariṣyanti devaputrā maharddhikāḥ
taṃ lokanātham udvīkṣya praviśantaṃ purottamam // MvyC_85

pathi bhūmiḥ sthitā tatra mṛdutūlapicūpamā
vicitraṃ ca śrutaṃ mālyaṃ vistariṣyanti te pathi // MvyC_86

chattradhvajapatākāni gandhamālyānulepanaiḥ
śrutaiś ca tūryanirghoṣaiḥ prasannamanaso narāḥ
śāstuḥ pūjāṃ kariṣyanti devaputrā maharddhikāḥ // MvyC_87

sa ca śakraḥ sahasrākṣo devarājo mahādyutiḥ
prahṛṣṭaḥ prāñjaliṃ kṛtvā stoṣyate lokanāyakam // MvyC_88

namas te puruṣājanya namas te puruṣottama
anukampasva janatāṃ bhagavann agrapudgala // MvyC_89

maharddhiko devaputras tasya māro bhaviṣyati
sa caiva prāñjaliṃ kṛtvā stoṣyate lokanāyakam // MvyC_90

brāhmaṇaparivāreṇa brahmā caiva puraskṛtaḥ
kathayiṣyati saddharmaṃ brahmaghoṣam udīrayan // MvyC_91

ākīrṇā pṛthivī sarvā arhadbhiś ca bhaviṣyati
kṣīṇāsravair vāntadoṣaiḥ prahīṇabhavabandhanaiḥ // MvyC_92

hṛṣṭā devā manuṣyāś ca gandharvā yakṣarākṣasāḥ
śāstuḥ pūjāṃ kariṣyanti nāgāś cāpi maharddhikāḥ // MvyC_93

te ca nūnaṃ bhaviṣyanti akhilāś chinnasaṃcayāḥ
chinnasrotā anādīnā uttīrnābhavasāgarāḥ
brahmacaryaṃ cariṣyanti maitreyasyānuśasane // MvyC_94

te vai nūnaṃ bhaviṣyanti amamā aparigrahāḥ
ajātarūparajatā aniketā asaṃstavāḥ
brahmacaryaṃ cariṣyanti maitreyasyānuśasane // MvyC_95

te vai nūnaṃ bhaviṣyanti chinnajālaviśaktikāḥ
dhyānāni copasaṃpadya prītisaukhyasamanvitāḥ
brahmacaryaṃ cariṣyanti maitreyasyānuśasane // MvyC_96

ṣaṣṭivarṣasahasrāṇi maitreyo dvipadottamaḥ
deśayiṣyati saddharmaṃ sarvabhūtānukampakam // MvyC_97

śatalakṣasahasrāṇi prāṇinaṃ sa vināyakaḥ
vinayitvā ca saddharmaṃ tato nirvāṇam eṣyati // MvyC_98

parinirvṛtasya x x tasyaiva x mahāmuneḥ
daśavarṣasahasrāṇi saddharmaḥ sthāsyate tadā // MvyC_99

prasādayitvā cittāni tasmin śākyamunau jine
tato drakṣyatha maitreyaṃ saṃbuddhaṃ dvipadottamam // MvyC_100

idam āścaryakaṃ śrutvā imām ṛddhim anuttamām
ko vidvān na prasīdeta atikṛṣṇābhijātikaḥ // MvyC_101

tasmād ihātmakāmena māhātmyam abhikāṅkṣiṇā
saddharmo gurukartavyaḥ smaratā buddhaśāsanam // MvyC_102

Maitreyavyākaraṇaṃ samāptam // ye dharmā (etc.) // cīnadeśīvinirgataḥ bhikṣu puṇyakīrtir yad atra puṇyaṃ tad bhavatv ācāryopādhyāyamātāpitṛpūrvaṅgamaṃ krtvā sakalasattvarāśer anuttarajñānaphalāptaya iti // śrīmad gopāladevarājyasaṃvat 57 phālguna dine 9 Ghosalīgrāme likhati / oṃ hārītī mahāyakṣiṇī hara hara mama sarvapāpāni svāhā //

3. Kathmandu Manuscript (complete), ed. Ishigami Ishigami, Zenno (1989), "Nepāru bon 'Maitreyavyākaraṇa'," Fujita Kḥtatsu Hakushi Kanreki Kinen Ronbunshū: Indotetsugaku to Bukkyḥ, Kyoto, 295-310. To facilitate searching, sandhis are standardized, misprints removed, some mistakes corrected.

Oṃ namo maitreyanāthāya //

evaṃ mayā śrutam ekasmiṃ samaye bhagavān rājagṛhe viharati sma / veṇuvane kalandakanivāse mahatā bhikṣusaṃghena sārdham ardhatrayodaśabhir bhikṣuśataiḥ //

atha khalv āyuṣmāñ

chāriputra mahāprajño dharmasenāpatir vibhuḥ
lokasya anukampārthaṃ śāstāraṃ paripṛcchati // MvyK_1

yo 'sāv anāgato buddho nirdiṣṭo lokanāyakaḥ
maitreya iti nāmnā 'sau sūtrapūrvāparāntike // MvyK_2

tasyāhaṃ vistarañ caivaṃ śrotum icchāmi nāyaka
ṛddhiñ cāsyānubhāvañ ca tan me brūhi narottama // MvyK_3

athainam avadac chāstā vyākariṣyāmy ahaṃ tava
vistaran tasya buddhasya maitreyasya śṛṇohi me // MvyK_4

udadhis tena kālena dvātriṃśatśatayojanaḥ
śoṣam āyāsyate yasmāc cakravartī yathā hy asau // MvyK_5

daśayojanasāhasrā jambudvīpo bhavaiṣyati
ālayaḥ sarvabhūtānāṃ vistareṇa samantataḥ // MvyK_6

ṛddhisphītā janapadā adaṇḍā anupadravāḥ
tatra kāle bhaviṣyanti narās te śubhakarminaḥ // MvyK_7

akaṇṭakā vasumatī samāharitaśādvalā
unnamantī namantī ca mṛdutūlapicūpamā // MvyK_8

akṛṣṭotpadyate śālimadhunāś ca sugandhi ca
cailavṛkṣā bhaviṣyanti nānāraṅgopaśobhitāḥ // MvyK_9

puṣpapatraphalotpatā vṛkṣāś ca krośam ucchritāḥ
aśītivarṣasahasrāṇi āyus teṣāṃ bhaviṣyati // MvyK_10

nirāmayāś ca te satvā vītaśokā mahotsavāḥ
varṇavanto mahāśakhyā mahānāgabalāc citāḥ // MvyK_11

trayā rogā bhaviṣyanti icchā anaśanaṃ jarā
pañcavarṣaśatā kanyā svāminam varayiṣyati // MvyK_12

tadā ketumatī nāma rājadhānī bhaviṣyati
āvāsaḥ śuddhasatvānāṃ prāṇināṃ śubhakarmiṇam // MvyK_13

yojanadvādaśāyāmaṃ saptayojanavistaram
nagaraṃ kṛtapuṇyānāṃ bhaviṣyati manoramam // MvyK_14

saptaratnamayāś caiva prakārāḥ krośam uccitāḥ
iṣṭakā dvārakhaṇḍānāṃ nānāratnavibhūṣitāḥ // MvyK_15

pariṣāś ca bhaviṣyanti ratna iṣṭakasaṃcitāḥ
padmotpalasamān kīrṇāś cakravākopaśobhitāḥ // MvyK_16

samantataḥ parivṛtāḥ saptabhis talāpaṅktibhiḥ
catūratnamayās tālāḥ kiṃkiṇī jālaśobhitāḥ // MvyK_17

vāteneritatālebhyas tadā śruti manoharāḥ
bhaviṣyanti śubhā śabdā tūryās pañcāṅgikā iva // MvyK_18

ye ca tasmin pure martyāḥ krīḍāratisukhānvitāḥ
tenaiva tālaśabdena krīḍiṣyanti pramoditāḥ // MvyK_19

puṣkariṇo bhaviṣyanti kumudotpalasaṃcetāḥ
udyānavanasaṃpannaṃ bhaviṣyati ca tat puram // MvyK_20

bhaviṣyati tadā rājā śamkho nāma mahādyutiḥ
mahābalacakravartī caturdvīpeśvaraḥ prabhuḥ // MvyK_21

caturaṅgabalopetaḥ saptaratnasamanvitaḥ
pūrṇasahasraputrāṇāṃ tasya rājño bhaviṣyati // MvyK_22

imāṃ samudraparyantām adaṇḍena vasundharām
pālayiṣyati dharmeṇa samena sa narādhipaḥ // MvyK_23

mahānidhānāś catvāro nayutaśatalakṣitāḥ
bhaviṣyanti tadā tasya rājñaḥ śaṃkhasya bhūpateḥ // MvyK_24

piṅgalaś ca kaliṅgeṣu mithilāyām ca pāṇḍukaḥ
elāpatraś ca gāndhāre śaṃkho vārāṇasīpure // MvyK_25

caturbhir ebhir nidhibhiḥ sa rājā susamanvitaḥ
bhaviṣyati mahāvīraḥ śatapuṇyaphalārpitaḥ // MvyK_26

brāhmaṇas tasya rājño 'tha subrahmā nāmnā purohitaḥ
bahuśrutaś caturvedī upadhyāyo bhaviṣyati // MvyK_27

adhyāpako mantradharaḥ smṛtivān vedapāragaḥ
kaiṭābhe ca sa nirghaṇṭe padavyākaraṇe tathā // MvyK_28

tasya brahmavatī nāma tadā bhāryā bhaviṣyati
darśanīyā prāsādikā abhirūpā yaśasvinī // MvyK_29

tuṣitebhyas tataś cyutvā maitreyo hy agrapudgalaḥ
tasyāḥ kukṣau sa niyataṃ pratisandhiṃ grahiṣyati // MvyK_30

daśa māsāṃś ca nikhilān dhārayitvā mahādyutim
supuṣpite ca udyāne gatvā maitreyamātaraḥ // MvyK_31

na niṣaṇṇā nipannā vā sthitā sā brahmacāriṇī
drumasya śākhām ālambya maitreyaṃ janayiṣyati // MvyK_32

niṣkramiṣyati pārśvena dakṣiṇāṅge narottamaḥ
abhrakūṭād yathā sūryo nirgataś ca prabhāyate // MvyK_33

kariṣyate samālokaṃ sanarāmaravanditaḥ
alipto garbhapaṅkena padmaṃ caiva yathāmbhuvā
traidhātukam idaṃ sarvaṃ prabhayā pūrayiṣyati // MvyK_34

pade pade nidhānaṃ ca padmaṃ padmaṃ bhaviṣyati
diśaś catasro udvīkṣya vācaṃ pravyāhariṣyati
iyaṃ me paścimā jātir nāsti bhūyaḥ punarbhavaḥ // MvyK_35

na punar āgamiṣyāmi nirvāsyāmi nirāśravaḥ
śītoṣṇavāridhārābhiḥ snāpayiṣyanti punnagāḥ // MvyK_36

divyāsurāṇi puṣpāṇi patiṣyanti nabhastalāt
śvetaṃ tasya surāś chattraṃ dhārayiṣyanti mūrdhani // MvyK_37

hṛṣṭaś caiva sahasrākṣo devarājaḥ śacīpatiḥ
pragrahīṣyati kumāraṃ taṃ dvātriṃśalakṣṇānvitam
śriyā jvalantaṃ maitreyaṃ mātur haste pradāsyati // MvyK_38

manoramāṃ ca śivikāṃ nānāratnavibhuṣitām
ārūḍhāṃ putrasahitāṃ vahiṣyanti ca devatāḥ // MvyK_39

tatas tūryasahasreṣu vādyamāneṣu tatpuram
praviṣṭamātre maitreye puṣpavarṣaṃ patiṣyati // MvyK_40

tasmiṃś ca divase nāryo gurviṇyaḥ prasaviṣyanti
sarvās tā janayiṣyanti putrān kṣemeṇa svastinā // MvyK_41

dṛṣṭvaivaṃ putraṃ subrahmā dvātriṃśadvaralakṣaṇam
pratyavekṣya sumantreṇa tataḥ prīto bhaviṣyati // MvyK_42

gatidvayaṃ kumārasya yathā mantreṣu dṛśyate
narādhipaś cakravartī buddho vā dvīpadottamaḥ // MvyK_43

sa ca yauvanasaṃprāpto maitreyo hy agrapudgalaḥ
cintayiṣyati dharmātmā duḥkhitā khalv iyaṃ prajā // MvyK_44

brahmasvaro mahāvego hemavarṇo mahādyutiḥ
viśālacakṣuḥ pīnāṅgaḥ padmapattranibhedekṣaṇaḥ // MvyK_45

ucchrayeṇa hastāśītiḥ kāyas tasya bhaviṣyati
vistāraṃ viṃśatir hastā tato 'rdham mukhamaṇḍalam // MvyK_46

aśītibhiś caturbhiś ca sahasraiḥ sa puraskṛtaḥ
māṇavānāṃ sa maitreyo mantrān adhyāpayiṣyati // MvyK_47

tataḥ śaṅkho mahārājo yūpam ucchrāpayiṣyati
ṣoḍaśavyāmavistāram ūrdhvavyāmasahasrakam // MvyK_48

sa taṃ yūpaṃ narapatir nānāratnavibhūṣitam
saptaratnasamākīrṇaṃ brāhmaṇebhyaḥ pradāsyati // MvyK_49

tac ca ratnamayaṃ yūpaṃ dattamātraṃ manoramam
brāhmaṇānāṃ sahasrāṇi vikariṣyanti tatkṣaṇāt // MvyK_50

tasya yūpasya maitreyo dṛṣṭvā cainām anityatām
kṛtsnaṃ vicintya saṃsāraṃ pravrajyāṃ rocayiṣyati // MvyK_51

yatv ahaṃ pravrajitveha spṛśeyam amṛtaṃ padam
vimocayeyaṃ janatāṃ vyādhimṛtyujarābhayāt // MvyK_52

aśītibhiś caturbhiś ca sahasraiḥ saṃpuraskṛtaḥ
niḥkramiṣyati maitreyaḥ pravrajyārtham agrapudgalaḥ // MvyK_53

nāgavṛkṣas tadā tasya bodhivṛkṣo bhaviṣyati
pañcāśadyojanās tasya ūrdhvaṃ śākhāḥ bhaviṣyanti
ṣaṭkrośaviṭapādyāni vidhūtāni samantataḥ // MvyK_54

tasya mūle niṣaṇṇo 'sau maitreyo dvipadottamaḥ
anuttarāṃ ca saṃbodhiṃ prāpsyate nātra saṃśayaḥ // MvyK_55

aṣṭāṅgopetayā vācā tataḥ sa puruṣottamaḥ
deśayiṣyati saddharmaṃ sarvaduḥkhāpahaṃ śivam // MvyK_56

duḥkhaṃ duḥkhasamutpādaṃ duḥkhasya samatikramam
āryāṣṭāṅgikaṃ mārgaṃ kṣemaṃ nirvāṇagāminam // MvyK_57

prasannāṃ janatāṃ dṛṣṭvā satyāni kathayiṣyati
tathāsya dharmaṃ saṃśrutvā pratipadyanti śāsane // MvyK_58

supuṣpite ca udyāne sannipāto bhaviṣyati
saṃpūrṇaṃ yojanaśataṃ parṣat tasya bhaviṣyati // MvyK_59

tataḥ śrutvā narapatiḥ śaṃkho nāma mahāyaśāḥ
dattvā dānam asaṃkhyeyaṃ pravrajyāṃ rocayiṣyati // MvyK_60

aśītibhiś caturbhiś ca sahasraiḥ sa puraskṛtaḥ
narādhipo 'pi niṣkramya pravrajyām upayāsyati // MvyK_61

tenaiva ca pramāṇena mānavānāṃ puraskṛtaḥ
maitreyasya pitā caiva pravrajyām upayāsyati // MvyK_62

tato gṛhapatis tatra sudhano nāma viśrutaḥ
pravrajiṣyati dharmātmā sahasraiḥ parivāritaḥ // MvyK_63

strīratnam atha śaṃkhasya viśākhā nāma viśrutā
aśītibhiś caturbhiś ca sahasraiḥ sā puraskṛtā
nārīṇāṃ saha niṣkramya pravrajyām upayāsyati // MvyK_64

prāṇināṃ tatra samaye sahasrāṇi śatāni ca
pravrajyām upayāsyanti maitreyasyānuśāsane // MvyK_65

tataḥ kāruṇikaḥ śāstā maitreyo dvipadottamaḥ
samitiṃ vyavalokyātha idam arthaṃ pravakṣyate // MvyK_66

sarve te śākyamuninā muniśreṣṭhena tāyinā
arthato lokanāthena dṛṣṭāḥ saddharmadhātunā
āropitā mokṣamārge nikṣiptā mama śāsane // MvyK_67

chatradhvajapatākābhir gandhamālyānulepanaiḥ
kṛtvā śākyamuneḥ pūjāṃ hy āgatā mama śāsane // MvyK_68

kuṃkumodakasekena candanenānulepanam
dattvā śākyamuneḥ stūpe hy āgatā mama śāsane // MvyK_69

buddhaṃ dharmaṃ ca saṃghaṃ ca gatvā tu śaraṇaṃ sadā
kṛtvā tu kuśalaṃ karma hy āgatā mama śāsane // MvyK_70

śikṣāpadān samādāya śākyasiṃhasya śāsane
pratipādya yathābhūtaṃ hy āgatā mama śāsane // MvyK_71

dattvā saṃghe ca dānāni cīvaraṃ pānabhojanam
vicitraṃ glānabhaiṣajyaṃ hy āgatā mama śāsane // MvyK_72

caturdaśīṃ pañcadaśīṃ pakṣasyehāṣṭamīṃ tathā
prātihārakapakṣaṃ ca aṣṭāṅgaṃ susamāhitaḥ
upavāsam upoṣyeha hy āgatā mama śāsane // MvyK_73

prātihāryatrayeṇāsau śrāvakān vinayiṣyati
sarve te sāsravān dharmān kṣayayiṣyanti suratāḥ // MvyK_74

prathamaḥ sannipāto 'sya śrāvakāṇāṃ bhaviṣyati
pūrṇāḥ ṣaṇnavati koṭyaḥ śrāvakāṇāṃ bhaviṣyati // MvyK_75

dvitīyaḥ sannipāto 'sya śrāvakāṇāṃ bhaviṣyati
pūrṇāś caturnavati koṭyaḥ kleśamuktā kṣaṇāṭ // MvyK_76

tṛtīyaḥ sannipāto 'sya śrāvakāṇāṃ bhaviṣyati
pūrṇā dvānavati koṭyo muktānāṃ śāntacetasām // MvyK_77

dharmacakraṃ pravartyātha vinīya suramānuṣān
sārdhaṃ śrāvakasaṃghena pure piṇḍaṃ cariṣyati // MvyK_78

tataḥ praveśatas tasya ramyāṃ ketumatīpurīm
māndāravāṇi puṣpāni patiṣyanti purottame
devatāḥ prakramiṣyanti tasmin pure gate munau // MvyK_79

catvāraś ca mahārājānaḥ śakraś ca tridaśādhipaḥ
brahma devagaṇaiḥ sārdhaṃ pūjāṃ tasya vidhāsyati // MvyK_80

utpalaṃ kumudaṃ padmaṃ puṇḍarīkaṃ sugandhikam
aguruṃ candanaṃ caiva divyamālyaṃ tathaiva ca // MvyK_81

cailakṣepaṃ vidhāsyanti devaputrā maharddhikāḥ
taṃ lokanātham udvīkṣya praviśantaṃ purottamam // MvyK_82

pathi tatra sthitā bhūmir mṛdus tūlapicūpamā
vicitraṃ ca tato mālyaṃ vikariṣyanti te pathi // MvyK_83

chattradhvajapatākābhir gandhamālyānulepanaiḥ
śubhaiś ca tūryanirghoṣaiḥ prasannamanaso narāḥ
śāstuḥ pūjāṃ kariṣyanti devaputrā maharddhikāḥ // MvyK_84

sa ca śakraḥ sahasrākṣo devarājo mahādyutiḥ
prahṛṣṭaḥ prāñjaliṃ kṛtvā stoṣyate lokanāyakam // MvyK_85

namas te puruṣasiṃha namas te puruṣottama
anukampasva janatāṃ bhagavann agrapudgala // MvyK_86

maharddhiko devaputras tasya māro bhaviṣyati
sa caiva prāñjaliṃ bhūtvā stoṣyate lokanāyakam // MvyK_87

śuddhāvāsasahasraiś ca bahubhiḥ parivāritaḥ
pravekṣate ketumatīṃ maitreyo lokanandanaḥ // MvyK_88

brāhmaṇaparivāreṇa brahmā caiva puraskṛtaḥ
kathayiṣyati saddharmaṃ brahmaghoṣam udīrayan // MvyK_89

ākīrṇā pṛthivī sarvā arhadbhiś ca bhaviṣyati
kṣīṇāsravair vāntadoṣaiḥ prahīṇabhavabandhanaiḥ // MvyK_90

hṛṣṭā devamanuṣyāś ca gandharvā yakṣarākṣasāḥ
śāstuḥ pūjāṃ kariṣyanti nāgāś cāpi maharddhikāḥ // MvyK_91

te vai nūnaṃ bhaviṣyanti akhilāś chinnasaṃśayāḥ
chinnasrotā anādātā uttīrnā bhavasāgarāt
brahmacaryaṃ cariṣyanti maitreyasyānuśasane // MvyK_92

te vai nūnaṃ bhaviṣyanti amamā aparigrahāḥ
ajātarūparajatā aniketā asaṃbhavāḥ
brahmacaryaṃ cariṣyanti maitreyasyānuśasane // MvyK_93

te vai nūnaṃ bhaviṣyanti chinnajālam aśaktikāḥ
dhyānāny upasaṃpādya prītisaukhyasamanvitāḥ
brahmacaryaṃ cariṣyanti maitreyasyānuśasane // MvyK_94

ṣaṣṭivarṣasahasrāṇi maitreyo dvipadottamaḥ
deśayiṣyati saddharmaṃ sarvabhūtānukampakaḥ // MvyK_95

śatalakṣasahasrāṇi prāṇinaṃ sa vināyakaḥ
vinayitvā ca saddharme tato nirvāṇam eṣyati // MvyK_96

parinirvṛtasya tasyaiva maitreyasya mahāmuneḥ
daśavarṣasahasrāṇi saddharmaḥ sthāsyate tadā // MvyK_97

prasādayiṣyatha cittāni tasmiṃ śākyamunau jine
tato drakṣyatha maitreyaṃ saṃbuddhaṃ dvipadottamam // MvyK_98

idam āścaryakaṃ śrutvā imām ṛddhim anuttamām
ko vidvān na prasīdeta api kṛṣṇābhijātikaḥ // MvyK_99

tasmād ihātmakāmena māhātmyam abhikāṃkṣatā
saddharmo gurukartavyaḥ smaratāṃ buddhaśāsanam // MvyK_100

iti maitreyavyākaraṇaṃ nāma mahāyānasūtraṃ samāptam | ye dharmā hetuprabhavā hetu teṣāṃ tathāgato hy avadat | teṣāṃ ca yo nirodha evaṃvādī mahāśramaṇaḥ || śubham astu || abdeglāvagnidvirade śita māghe guhānane | pūṣāyāṃ pūṣṇadivase sarvvānanda samāpta kṛt ||