Yāmuna: Stotraratna

namo 'cintyādbhutākliṣṭajñānavairāgyarāśaye |
nāthāya munaye 'gādhabhagavadbhaktisindhave || YStr_1

namo 'cintya-adbhuta-akliṣṭa-jñāna-vairāgya-rāśaye | nāthāya munaye 'gādha-bhagavad-bhakti-sindhave ||

tasmai namo madhujidaṅghrisarojatattvajñānānurāgamahimātiśayāntasīmne |
nāthāya nāthamunaye 'tra paratra cāpi nityaṃ yadīyacaraṇau śaraṇaṃ madīyam || YStr_2

tasmai namo madhujid-aṅghri-saroja-tattva-jñāna-anurāga-mahima-atiśaya-antasīmne | nāthāya nātha-munaye 'tra paratra ca api nityaṃ yadīya-caraṇau śaraṇaṃ madīyam ||

bhūyo namo 'parimitācyutabhaktitattvajñānāmṛtābdhiparivāhaśubhair vacobhiḥ |
loke 'vatīrṇaparamārthasamagrabhaktiyogāya nāthamunaye yamināṃ varāya || YStr_3

bhūyo namo 'parimita-acyuta-bhakti-tattva-jñāna-amṛta-abdhi-parivāha-śubhair vacobhiḥ | loke 'vatīrṇa-parama-artha-samagra-bhakti-yogāya nātha-munaye yamināṃ varāya ||

tattvena yaś cidacidīśvaratatsvabhāvabhogāpavargatadupāyagatīr udāraḥ |
saṃdarśayan niramimīta purāṇaratnaṃ tasmai namo munivirāya parāśarāya || YStr_4

tattvena yaś cid-acid-īśvara-tat-svabhāva-bhoga-apavarga-tad-upāya-gatīr udāraḥ | saṃdarśayan niramimīta purāṇa-ratnaṃ tasmai namo muni-virāya parāśarāya ||

mātā pitā yuvatayas tanayā vibhūtiḥ sarvaṃ yad eva niyamena madanvayānām |
ādyasya naḥ kulapater vakulābhirāmaṃ śrīmat tadaṅghriyugalaṃ praṇamāmi mūrdhnā || YStr_5

mātā pitā yuvatayas tanayā vibhūtiḥ sarvaṃ yad eva niyamena mad-anvayānām | ādyasya naḥ kula-pater vakula-abhirāmaṃ śrīmat tad-aṅghri-yugalaṃ praṇamāmi mūrdhnā ||

yan mūrdhni me śrutiśirassu ca bhāti yasminn asmanmanorathapathaḥ sakalaḥ sameti |
stoṣyāmi naḥ kuladhanaṃ kuladaivataṃ tat pādāravindam aravindavilocanasya || YStr_6

yan mūrdhni me śruti-śirassu ca bhāti yasminn asman-mano-ratha-pathaḥ sakalaḥ sameti | stoṣyāmi naḥ kula-dhanaṃ kula-daivataṃ tat pāda-āravindam aravinda-vilocanasya ||

tattvena yasya mahimārṇavaśīkarāṇuḥ śakyo na mātum api śarvapitāmahādyaiḥ |
kartuṃ tadīyamahimastutim udyatāya mahyaṃ namo 'stu kavaye nirapatrapāya || YStr_7

tattvena yasya mahima-arṇava-śīkara-aṇuḥ śakyo na mātum api śarva-pitāmaha-adyaiḥ | kartuṃ tadīya-mahima-stutim udyatāya mahyaṃ namo 'stu kavaye nirapatrapāya ||

yad vā śramāvadhi yathāmati vāpy aśaktaḥ staumy evam eva khalu te 'pi sadā stuvantaḥ |
vedāś catur mukhamukhāś ca; mahārṇavāntaḥ ko majjator aṇukulācalayor viśeṣaḥ ? || YStr_8

yad vā śrama-avadhi yathā-mati va āpy aśaktaḥ staumy evam eva khalu te 'pi sadā stuvantaḥ | vedāś catur mukha-mukhāś ca; mahā-arṇava-antaḥ ko majjator aṇu-kula-acalayor viśeṣaḥ ? ||

kiṃ caiṣa śaktyatiśayena na te 'nukampyaḥ stotāpi tu stutikṛtena pariśrameṇa |
tatra śramas tu sulabho mama mandabuddher ity udyamo 'yam ucito mama cābjanetra ! || YStr_9

kiṃ ca eṣa śakty-atiśayena na te 'nukampyaḥ stota āpi tu stuti-kṛtena pariśrameṇa | tatra śramas tu sulabho mama manda-buddher ity udyamo 'yam ucito mama ca abja-netra ! ||

nāvekṣase tyadi tato bhuvanāny amūni nālaṃ prabho bhavitum eva kutaḥ pravṛttiḥ ? |
evaṃ nisargasuhṛdi tvayi sarvajantâüḥ svāmin ! citram idam āśritavatsalatvam || YStr_10

na avekṣase tyadi tato bhuvanāny amūni na alaṃ prabho bhavitum eva kutaḥ pravṛttiḥ ? | evaṃ nisarga-suhṛdi tvayi sarva-jantâüḥ svāmin ! citram idam āśrita-vatsalatvam ||

svābhāvikānavadhikātiśayeśitṛtvaṃ nārāyaṇa ! tvayi na mṛṣyati vaidikaḥ kaḥ ? |
brahmā śivaḥ śatamakhaḥ paramasvarāḍ ity ete 'pi yasya mahimārṇavavipraṣas te || YStr_11

svābhāvika-anavadhika-atiśaya-īśitṛtvaṃ nārāyaṇa ! tvayi na mṛṣyati vaidikaḥ kaḥ ? | brahmā śivaḥ śatamakhaḥ parama-sva-rāḍ ity ete 'pi yasya mahima-arṇava-vipraṣas te ||

kaś śrīḥ śriyaḥ ? paramasattvasamāśrayaḥ kaḥ ? kaḥ puṇḍarīkanayanaḥ ? puruṣottamaḥ kaḥ ? |
kasyāyutāyutaikakalāṃśakāṃśe viśvaṃ vicitracidacitpravibhāgavṛttam || YStr_12

kaś śrīḥ śriyaḥ ? parama-sattva-samāśrayaḥ kaḥ ? kaḥ puṇḍarīka-nayanaḥ ? puruṣottamaḥ kaḥ ? | kasya ayuta-ayuta-eka-kalāṃśaka-aṃśe viśvaṃ vicitra-cidacit-pravibhāga-vṛttam ||

vedāpahāragurupātakadaityapīḍāpadvimocanamahiṣṭhaphalapradānaiḥ |
ko 'nyaḥ prajāpaśupatī paripāti ? kasya pādodakena sa śivaḥ svaśirodhṛtena ? || YStr_13

veda-apahāra-guru-pātaka-daitya-pīḍa-āpad-vimocana-mahiṣṭha-phala-pradānaiḥ | ko 'nyaḥ prajā-paśu-patī paripāti ? kasya pāda-udakena sa śivaḥ sva-śiro-dhṛtena ? ||

kasyodare haraviriñcamukhaḥ prapañcaḥ ? ko rakṣatīmam ? ajaniṣṭa ca kasya nābheḥ ? |
krāntvā nigīrya punar udgirati tvadanyaḥ kaḥ ? kena vaiṣa paravān iti śakyaśaṅkaḥ ? || YStr_14

kasya udare hara-viriñca-mukhaḥ prapañcaḥ ? ko rakṣati imam ? aja-niṣṭa ca kasya nābheḥ ? | krāntvā nigīrya punar udgirati tvad-anyaḥ kaḥ ? kena va aiṣa paravān iti śakya-śaṅkaḥ ? ||

tvāṃ śīlarūpacaritaiḥ paramaprakṛṣṭasattvena sāttvikatayā prabalaiś ca śāstraiḥ |
prakhyātadaivaparamārthavidāṃ mataiś ca naivāsuraprakṛtayaḥ prabhavanti boddhum || YStr_15

tvāṃ śīla-rūpa-caritaiḥ parama-prakṛṣṭa-sattvena sāttvikatayā prabalaiś ca śāstraiḥ | prakhyāta-daiva-parama-artha-vidāṃ mataiś ca na eva asura-prakṛtayaḥ prabhavanti boddhum ||

ullaṅghitatrividhasīmasamātiśāyisaṃbhāvanaṃ tava paribraḍhimasvabhāvam |
māyābalena bhavatāpi niguhyamānaṃ paśyanti kecid aniśaṃ tvadananyabhāvāḥ || YStr_16

ullaṅghita-trividha-sīma-sama-atiśāyi-saṃbhāvanaṃ tava paribraḍhima-svabhāvam | māyā-balena bhavata āpi niguhyamānaṃ paśyanti kecid aniśaṃ tvad-ananya-bhāvāḥ ||

yad aṇḍam aṇḍāntaragocaraṃ ca yaddaśottarāṇy āvaraṇāni yāni ca |
guṇāḥ pradhānaṃ puruṣaḥ paraṃ padaṃ parāt paraṃ brahma ca te vibhūtayaḥ || YStr_17

yad aṇḍam aṇḍa-antara-gocaraṃ ca yad-daśa-uttarāṇy āvaraṇāni yāni ca | guṇāḥ pradhānaṃ puruṣaḥ paraṃ padaṃ parāt paraṃ brahma ca te vibhūtayaḥ ||

vaśī vadānyo guṇavān ṛjuḥ śucir mṛdur dayālur madhuraḥ sthiraḥ samaḥ |
kṛtī kṛtajñas tvam api svabhāvataḥ samastakalyāṇaguṇāmṛtodadhiḥ || YStr_18

vaśī vadānyo guṇavān ṛjuḥ śucir mṛdur dayālur madhuraḥ sthiraḥ samaḥ | kṛtī kṛta-jñas tvam api svabhāvataḥ samasta-kalyāṇa-guṇa-amṛta-udadhiḥ ||

upary upary abjabhuvo 'pi pūruṣān prakalpya te ye śatam ity anukramāt |
giras tvad ekaikaguṇāvdhīpsayā sadā sthitā nodyamato 'tiśerate || YStr_19

upary upary abja-bhuvo 'pi pūruṣān prakalpya te ye śatam ity anukramāt | giras tvad eka-eka-guṇa-avdhīpsayā sadā sthitā na udyamato 'tiśerate ||

tvadāśritānāṃ jagadudbhavasthitapraṇāśasaṃsāravimocanādayaḥ |
bhavanti līlāvidhayaś ca vaidikās tvadīyagambhīramano'nusāriṇaḥ || YStr_20

tvad-āśritānāṃ jagad-udbhava-sthita-praṇāśa-saṃsāra-vimocana-ādayaḥ | bhavanti līlā-vidhayaś ca vaidikās tvadīya-gambhīra-mano-'nusāriṇaḥ ||

namo namo vāṅmanasātibhūmaye namo namo vāṅmanasaikabhūmaye |
namo namo 'nantamahāvibhūtaye namo namo 'nantadayaikasandhive || YStr_21

namo namo vāṅ-manasā-atibhūmaye namo namo vāṅ-manasā-eka-bhūmaye | namo namo 'nanta-mahā-vibhūtaye namo namo 'nanta-dayā-eka-sandhive ||

na dharmaniṣṭho 'smi, na cātmavedī, na bhaktimāṃs tvaccaraṇāravinde |
akiñcano 'nanyagatiḥ śaraṇya ! tvatpādamūlaṃ śaraṇaṃ prapadye || YStr_22

na dharma-niṣṭho 'smi, na cā atma-vedī, na bhaktimāṃs tvac-caraṇa-āravinde | akiñcano 'nanya-gatiḥ śaraṇya ! tvat-pāda-mūlaṃ śaraṇaṃ prapadye ||

na ninditaṃ karma tad asti loke sahasraśo yan na mayā vyadhāyi |
so 'haṃ vipākāvasare mukunda ! krandāmi sampraty agatis tavāgre || YStr_23

na ninditaṃ karma tad asti loke sahasraśo yan na mayā vyadhāyi | so 'haṃ vipāka-avasare mukunda ! krandāmi sampraty agatis tava agre ||

nimajjato 'nanta ! bhavārṇavāntaś cirāya me kūlam ivāsi labdhaḥ |
tvayāpi labdhaṃ bhagavann idānīm anuttamaṃ pātram idaṃ dayāyāḥ || YStr_24

nimajjato 'nanta ! bhava-arṇava-antaś cirāya me kūlam iva asi labdhaḥ | tvaya āpi labdhaṃ bhagavann idānīm anuttamaṃ pātram idaṃ dayāyāḥ ||

abhūtapūrvaṃ mama bhāvi kiṃ vā sarvaṃ sahe me sahajaṃ hi duḥkham |
kiṃ tu tvadagre śaraṇāgatānāṃ parābhavo nātha ! na te 'nurūpaḥ || YStr_25

abhūta-pūrvaṃ mama bhāvi kiṃ vā sarvaṃ sahe me sahajaṃ hi duḥkham | kiṃ tu tvad-agre śaraṇāgatānāṃ parā-bhavo nātha ! na te 'nurūpaḥ ||

nirāsakasyāpi na tāvad utsahe maheśa ! hātuṃ tava pādapaṅkajam |
ruṣā nirasto 'pi śiśuḥ stanandhayo na jātu mātuś caraṇau jihāsati || YStr_26

nirāsakasya api na tāvad utsahe maheśa ! hātuṃ tava pāda-paṅkajam | ruṣā nirasto 'pi śiśuḥ stanandhayo na jātu mātuś caraṇau jihāsati ||

tavāmṛtasyandini pādakaṅkaje niveśitātmā katham anyad icchati |
sthite 'ravinde makarandanirbhare madhuvrato nekṣurakaṃ hi vīkṣate || YStr_27

tava-amṛta-syandini pāda-kaṅkaje niveśita-ātmā katham anyad icchati | sthite 'ravinde makaranda-nirbhare madhu-vrato na ikṣurakaṃ hi vīkṣate ||

tvadaṅghrim uddiśya kadāpi kenacid yathā tathā vāpi sakṛt kuto 'ñjaliḥ |
tadaiva muṣṇāty aśubhāby aśeṣataḥ śubhāni puṣṇāti na jātu hīyate || YStr_28

tvad-aṅghrim uddiśya kada āpi kenacid yathā tathā va āpi sakṛt kuto 'ñjaliḥ | tada aiva muṣṇāty aśubhāby aśeṣataḥ śubhāni puṣṇāti na jātu hīyate ||

udīrṇasaṃsāradavāśuśukṣaṇiṃ kṣaṇena nirvāpya parāṃ ca nirvṛtim |
prayacchati tvaccaraṇāruṇāmbujadvayānurāgāmṛtasindhuśīkaraḥ || YStr_29

udīrṇa-saṃsāra-dava-aśuśukṣaṇiṃ kṣaṇena nirvāpya parāṃ ca nirvṛtim | prayacchati tvac-caraṇa-āruṇa-ambuja-dvaya-anurāga-amṛta-sindhu-śīkaraḥ ||

vilāsavikrāntaparāvarālayaṃ namasyadārtikṣapaṇe kṛtakṣaṇam |
dhanaṃ madīyaṃ tava pādapaṅkajaṃ kadā nu sākṣātkaravāṇi cakṣuṣā ? || YStr_30

vilāsa-vikrānta-para-avara-ālayaṃ namasyad-ārti-kṣapaṇe kṛta-kṣaṇam | dhanaṃ madīyaṃ tava pāda-paṅkajaṃ kadā nu sākṣāt-karavāṇi cakṣuṣā ? ||

kadā punaḥ śaṅkharathāṅgakalpakadhvajāravindāṅkuśavajralāñchanam |
trivikrama ! tvaccaraṇāmbujadvayaṃ madīyamūrdhānam alaṅkariṣyati || YStr_31

kadā punaḥ śaṅkha-rathāṅga-kalpaka-dhvaja-āravinda-aṅkuśa-vajra-lāñchanam | trivikrama ! tvac-caraṇa-ambuja-dvayaṃ madīya-mūrdhānam alaṅkariṣyati ||

virājamānojjvalapītavāsasaṃ smitātasīsūnasamāmalacchavim |
nimagnanābhiṃ tanumadhyamunnataṃ viśālavakṣassthalaśobhilakṣaṇam || YStr_32

virājamāna-ujjvala-pīta-vāsasaṃ smita-atasī-sūna-sama-amala-cchavim | nimagna-nābhiṃ tanu-madhya-munnataṃ viśāla-vakṣas-sthala-śobhi-lakṣaṇam ||

cakāsataṃ jyākiṇakarkaśaiḥ śubhaiś caturbhir ājānuvilambhir bhuhaiḥ |
priyāvataṃsotpalakarṇabhūṣaṇaślathālakābandhavimardaśaṃsibhiḥ || YStr_33

cakāsataṃ jyā-kiṇa-karkaśaiḥ śubhaiś caturbhir ājānu-vilambhir bhuhaiḥ | priya-avataṃsa-utpala-karṇa-bhūṣaṇa-ślatha-alakā-bandha-vimarda-śaṃsibhiḥ ||

udagrapīnāṃsavilambikuṇḍalālakāvalībandhurakanbukandharam |
mukhaśriyā nyakkṛtapūrṇanirmalāmṛtāṃśubimbāmburuhojjvalaśriyam || YStr_34

udagra-pīna-aṃsa-vilambi-kuṇḍala-alaka-avalī-bandhura-kanbukandharam | mukha-śriyā nyakkṛta-pūrṇa-nirmala-amṛta-aṃśu-bimba-amburuha-ujjvala-śriyam ||

prabuddhamugdhāmbujacārulocanaṃ savibhramabhrūlatam ujjvalādharam |
śucismitaṃ komalagaṇḍam unnasaṃ lalāṭaparyantavilambitālakam || YStr_35

prabuddha-mugdha-ambuja-cāru-locanaṃ savibhrama-bhrūlatam ujjvala-adharam | śuci-smitaṃ komala-gaṇḍam unnasaṃ lalāṭa-paryanta-vilambita-alakam ||

sphuratkirīṭāṅgadahārakaṇḍhikāmaṇīndrakāñcīguṇanūpurādibhiḥ |
rathāṅgaśaṅkhāsigadādhanurvarair lasattulasyā vanamālayojjvalam || YStr_36

sphurat-kirīṭa-aṅgada-hāra-kaṇḍhikā-maṇi-indra-kāñcīguṇa-nūpura-ādi-bhiḥ | ratha-aṅga-śaṅkha-asi-gadā-dhanur-varair lasat-tulasyā vanamālaya-ujjvalam ||

cakartha yasyā bhavanaṃ bhujāntaraṃ tava priyaṃ dhāma yadīyajanmabhūḥ |
jagatsamastaṃ yadapāṅgasaṃśrayaṃ yadartham ambhodhir amanthy abandhi ca || YStr_37

cakartha yasyā bhavanaṃ bhuja-antaraṃ tava priyaṃ dhāma yadīya-janma-bhūḥ | jagat-samastaṃ yad-apāṅga-saṃśrayaṃ yad-artham ambhodhir amanthy abandhi ca ||

svavaiśvarūpyeṇa sadānubhūtayāpy apūrvavadvismayamādadhānayā |
guṇena rūpeṇa vilāsaceṣṭitais sadā tavaivocitayā tava śriyā || YStr_38

sva-vaiśvarūpyeṇa sadā-anubhūtaya āpy apūrvavad-vismaya-māda-dhānayā | guṇena rūpeṇa vilāsa-ceṣṭitais sadā tava eva ucitayā tava śriyā ||

tayā sahāsīnam anantabhogini prakṛṣṭavijñānabalaikadhāmani |
phaṇāmaṇivrātamayūkhamaṇḍalaprakāśamānodaradivyadhāmani || YStr_39

tayā saha-asīnam ananta-bhogini prakṛṣṭa-vijñāna-bala-eka-dhāmani | phaṇā-maṇi-vrāta-mayūkha-maṇḍala-prakāśamāna-udara-divya-dhāmani ||

nivāsaśayyāsanapādukāṃśukopadhānavarṣātapavāraṇādibhiḥ |
śarīrabhedais tava śeṣatāṃ gatair yathocitaṃ śṣa itīrite janaiḥ || YStr_40

nivāsa-śayyāsana-pāduka-aṃśuka-upadhāna-varṣa-ātapa-vāraṇa-ādibhiḥ | śarīra-bhedais tava śeṣatāṃ gatair yathā-ucitaṃ śṣa itī irite janaiḥ ||

dāsas sakhā vāhanam āsanaṃ dhvajo yas te vitānaṃ vyajanaṃ trayīmayaḥ |
upasthitaṃ tena puro garutmatā tvadaṅghrisammardakiṇāṅkaśobhanā || YStr_41

dāsas sakhā vāhanam āsanaṃ dhvajo yas te vitānaṃ vyajanaṃ trayī-mayaḥ | upasthitaṃ tena puro garutmatā tvad-aṅghri-sammarda-kiṇa-aṅka-śobhanā ||

tvadīyabhuktojjihitaśeṣabhojinā tvayā nisṛṣṭātmabhareṇa yadyathā |
priyeṇa senāpatinā nyavedi tattathānujānantam udāravīkṣanaiḥ || YStr_42

tvadīya-bhukta-ujjihita-śeṣa-bhojinā tvayā nisṛṣṭa-ātma-bhareṇa yad-yathā | priyeṇa senāpatinā nyavedi tat-tathā-anujānantam udāra-vīkṣanaiḥ ||

hatākhilakleśamalaiḥ svabhāvatas tvadānukūlyaikarasais tavocitaiḥ |
gṛhītatattatparicārasādhanair niṣevyamāṇaṃ sacivair yathocitaṃ || YStr_43

hata-akhila-kleśa-malaiḥ svabhāvatas tvad-ānukūlya-eka-rasais tava-ucitaiḥ | gṛhīta-tat-tat-paricāra-sādhanair niṣevyamāṇaṃ sacivair yathā-ucitaṃ ||

apūrvanānārasabhāvanirbhadraprabaddhayā mugdhavidaghalīlayā |
kṣaṇāṇuvat kṣiptaparādikālayā praharṣayantaṃ mahiṣīṃ mahābhujanam || YStr_44

apūrva-nānā-rasa-bhāva-nirbhadra-prabaddhayā mugdha-vidagha-līlayā | kṣaṇa-aṇuvat kṣipta-para-ādi-kālayā praharṣayantaṃ mahiṣīṃ mahābhujanam ||

acintyadivyādbhutanityayauvanasvabhāvalāvaṇyamayāmṛtodadhim |
śriyaḥ śriyaṃ bhaktajanaikajīvitaṃ samartham āpatsakham arthikalpakam || YStr_45

acintya-divya-adbhuta-nitya-yauvana-svabhāva-lāvaṇya-maya-amṛta-udadhim | śriyaḥ śriyaṃ bhakta-jana-eka-jīvitaṃ samartham āpat-sakham arthi-kalpakam ||

bhagavantam evānucaran nirantaraṃ praśāntaniśśeṣamanorathāntaraḥ |
kadāham aikāntikanityakiṅkaraḥ praharṣayiṣyāmi sanāthajīvitaḥ || YStr_46

bhagavantam eva anucaran nirantaraṃ praśānta-niśśeṣa-manoratha-antaraḥ | kada āham aikāntika-nitya-kiṅkaraḥ praharṣayiṣyāmi sanātha-jīvitaḥ ||

dhig aśucim avinītaṃ nirbhayaṃ mām alajjaṃ paramapuruṣa yo 'ham yogivaryāgragaṇyaiḥ |
vidhśivasanakādyair dhyātum atyantadūraṃ tava parijanabhāvaṃ kāmaye kāmavṛttaḥ || YStr_47

dhig aśucim avinītaṃ nirbhayaṃ mām alajjaṃ parama-puruṣa yo 'ham yogi-varya-agra-gaṇyaiḥ | vidh-śiva-sanaka-ādyair dhyātum atyanta-dūraṃ tava parijana-bhāvaṃ kāmaye kāma-vṛttaḥ ||

aparādhasahasrabhājanaṃ patitaṃ bhīmabhavārṇavodare |
atagiṃ śaraṇāgataṃ hare kṛpayā kevalam ātmasātkuru || YStr_48

aparādha-sahasra-bhājanaṃ patitaṃ bhīma-bhava-arṇava-udare | atagiṃ śaraṇāgataṃ hare kṛpayā kevalam ātma-sāt-kuru ||

avivekaghanāndhadiṅmukhe bahudhā santataduḥkhavarṣiṇi |
bhagavan bhavadurdine pathaḥ skhalitaṃ mām avalokayāciyuta || YStr_49

aviveka-ghana-andha-diṅmukhe bahudhā santata-duḥkha-varṣiṇi | bhagavan bhava-durdine pathaḥ skhalitaṃ mām avalokaya aciyuta ||

na mṛṣā paramārtham eva me śṛnu vijñāpanam ekam agrataḥ |
yadi me na dayiṣyase tato dayanīyas tava nātha durlabhaḥ || YStr_50

na mṛṣā parama-artham eva me śṛnu vijñāpanam ekam agrataḥ | yadi me na dayiṣyase tato dayanīyas tava nātha durlabhaḥ ||

tad ahaṃ tvad ṛte na nāthavān mad ṛte tvaṃ dayanīyavān na ca |
vidhinirmitam etam anvayaṃ bhagavān palaya mā sma jīhapaḥ || YStr_51

tad ahaṃ tvad ṛte na nāthavān mad ṛte tvaṃ dayanīyavān na ca | vidhi-nirmitam etam anvayaṃ bhagavān palaya mā sma jīhapaḥ ||

vapurādiṣu yo 'pi ko 'pi vā guṇato 'sāni yathātathāvidhaḥ |
tad ayaṃ tava pādapadmayor aham adyaiva mayā samarpitaḥ || YStr_52

vapur-ādiṣu yo 'pi ko 'pi vā guṇato 'sāni yathā-tathā-vidhaḥ | tad ayaṃ tava pāda-padmayor aham adya eva mayā samarpitaḥ ||

mama nātha yad asti yo 'smy ahaṃ sakalaṃ tad dhi tavaiva mādhava |
niyatasvam iti prabuddhadhīr atha vā kiṃ nu samarpayāmi te || YStr_53

mama nātha yad asti yo 'smy ahaṃ sakalaṃ tad dhi tava eva mādhava | niyata-svam iti prabuddha-dhīr atha vā kiṃ nu samarpayāmi te ||

avabodhitavān imāṃ yathā mayi nityāṃ bhavadīyatāṃ svayam |
kṛpayaivam ananyabhogyatāṃ bhagavan bhaktim api prayaccha me || YStr_54

avabodhitavān imāṃ yathā mayi nityāṃ bhavadīyatāṃ svayam | kṛpaya aivam ananya-bhogyatāṃ bhagavan bhaktim api prayaccha me ||

tava dāsyasukhaikasaṅghināṃ bhavaneṣu astv api kīṭajanma me |
itarāvasatheṣu mā sma bhūd api me janma caturmukhātmanā || YStr_55

tava dāsya-sukha-eka-saṅghināṃ bhavaneṣu astv api kīṭa-janma me | itara-avasatheṣu mā sma bhūd api me janma catur-mukha-ātmanā ||

sakṛt tvadākāravilokanāśayā tṛṇīkṛtānuttamabhuktimuktibhiḥ |
mahātmabhir mām avalokyatāṃ naya kṣaṇe 'pi te yad viraho 'tidussahaḥ || YStr_56

sakṛt tvad-ākāra-vilokana-āśayā tṛṇīkṛta-anuttama-bhukti-muktibhiḥ | mahā-ātmabhir mām avalokyatāṃ naya kṣaṇe 'pi te yad viraho 'tidussahaḥ ||

na dehaṃ na prāṇān na ca sukham aśeṣābhilaṣitaṃ na cātmānaṃ nānyat ki api tava śeṣatvavibhavāt
bahirbhūtaṃ nātha kṣaṇam api sahe yātu śatadhā vināśaṃ tat satyaṃ madhumathana vijñāpanam idam || YStr_57

na dehaṃ na prāṇān na ca sukham aśeṣa-abhilaṣitaṃ na cā atmānaṃ na anyat ki api tava śeṣatva-vibhavāt bahir-bhūtaṃ nātha kṣaṇam api sahe yātu śatadhā vināśaṃ tat satyaṃ madhumathana vijñāpanam idam ||

durantasyānāder apariharaṇīyasya mahato nihīnācāro 'haṃ nṛpaśur aśubhasyāspadam api
dayāsindho bandho niravadhikavātsalyajaladhe tava smāraṃ smāraṃ guṇagaṇam itīcchāmi gatabhīḥ || YStr_58

durantasya anāder apariharaṇīyasya mahato nihīna-ācāro 'haṃ nṛpaśur aśubhasyā aspadam api dayā-sindho bandho niravadhika-vātsalya-jaladhe tava smāraṃ smāraṃ guṇa-gaṇam iti icchāmi gatabhīḥ ||

anicchann apy evaṃ yadi punar itīcchann iva rajastamaśchannac chadmastutivacanabhaṅgīṃ aracayam |
tathāpītthaṃrūpaṃ vacanam avalambyāpi kṛpayā tvam evaivambhūtaṃ dharaṇidhara me śikṣaya manaḥ || YStr_59

anicchann apy evaṃ yadi punar iti icchann iva rajas-tamaś-channac chadma-stuti-vacana-bhaṅgīṃ aracayam | tatha āpi itthaṃ-rūpaṃ vacanam avalambya api kṛpayā tvam eva evam-bhūtaṃ dharaṇi-dhara me śikṣaya manaḥ ||

pitā tvaṃ mātā tvaṃ dayitatanayas tvaṃ priyasuhṛt tvam eva tvaṃ mitram gurur asi gatiś cāsi jagatām |
tvadīyas tvadhbṛtyas tava parijanas tvadgatir ahaṃ prapannaś caivaṃ saty aham api tavaivāsmi hi bharaḥ || YStr_60

pitā tvaṃ mātā tvaṃ dayita-tanayas tvaṃ priya-suhṛt tvam eva tvaṃ mitram gurur asi gatiś ca asi jagatām | tvadīyas tvad-hbṛtyas tava parijanas tvad-gatir ahaṃ prapannaś ca evaṃ saty aham api tava eva asmi hi bharaḥ ||

janitvāhaṃ vaṃśe mahati jagati khyaatayaśasāṃ śucīnāṃ yuktānāṃ guṇapuruṣatattvasthitividām
nisargād eva tvaccaraṇakamalāikāntamanasām adho 'dhaḥ pāpātmā śaraṇada nimajjāmi tamasi || YStr_61

janitva āhaṃ vaṃśe mahati jagati khyaata-yaśasāṃ śucīnāṃ yuktānāṃ guṇa-puruṣa-tattva-sthiti-vidām nisargād eva tvac-caraṇa-kamala-aikānta-manasām adho 'dhaḥ pāpa-ātmā śaraṇa-da nimajjāmi tamasi ||

amaryādaḥ kṣudraś calamatir asūyaprasavabhūḥ kṛtaghno durmānī smaraparavaśo vañcanaparaḥ |
nṛśaṃsaḥ pāpiṣṭhaḥ katham aham ito duḥkhajaladher apārād uttīrṇas tava paricareyaṃ caraṇayoḥ || YStr_62

amaryādaḥ kṣudraś cala-matir asūya-prasava-bhūḥ kṛta-ghno durmānī smara-para-vaśo vañcana-paraḥ | nṛ-śaṃsaḥ pāpiṣṭhaḥ katham aham ito duḥkha-jala-dher apārād uttīrṇas tava paricareyaṃ caraṇayoḥ ||

raghuvara yad abhūs tvaṃ tādṛśo vāyasasya praṇata iti dayālur yac ca caidyasya kṛṣṇa |
pratibhavam aparāddhur mugdha sāyujyado 'bhūr vada kim apadam āgas tasya te 'si kṣamāyāḥ || YStr_63

raghuvara yad abhūs tvaṃ tādṛśo vāyasasya praṇata iti dayālur yac ca caidyasya kṛṣṇa | pratibhavam aparāddhur mugdha sāyujyado 'bhūr vada kim apadam āgas tasya te 'si kṣamāyāḥ ||

nanu prapannas sakṛd eva nātha tavāhaṃ asmīti ca yācamānaḥ |
tavānukampyas smartaḥ pratijñānāṃ madekavarjaṃ kim idaṃ vrataṃ te || YStr_64

nanu prapannas sakṛd eva nātha tava ahaṃ asmi iti ca yācamānaḥ | tava anukampyas smartaḥ pratijñānāṃ mad-eka-varjaṃ kim idaṃ vrataṃ te ||